政壇：搞搞政：建制河蟹騷守護添馬

消息指建制派今年想一改過往集中資源喺大球場搞大型匯演，而係分散投資喺全港多區舉行嘉年華活動。以觀塘區為例，據聞會喺七一當日，分別喺油塘、秀茂坪同牛頭角舉行三場與眾同樂嘅活動。至於作為政治經濟核心嘅中西區，更有意趁住民陣放棄以金鐘政府總部為遊行終點，破天荒喺添馬公園搞嘉年華。有知情人士形容喺添馬公園搞嘉年華係象徵意義大過一切，似乎有啲向「佔中」預演示威嘅味道。

據聞有團體亦意向有需要人士派發福袋，另有工商界更積極籌備喺七一前後搞商戶優惠日，例如畀貧苦家庭以優惠價購買書籍文具，長者亦可以優惠價添置日用品等。

不能忽略嘅係有份搞七一活動嘅大旗手、工聯會榮譽會長鄭耀棠最後會使出乜嘢撒手鐧，嚟搶晒大家眼球。建制派連串招數用意係要「遍地開花」營造社區和諧氣氛，睇嚟「佔中」預演到時都未必搞得起。