政壇：民促會提騎呢普選方案
龍家麟（右）同司馬文對自己提嘅普選方案都未搞清楚。
再有泛民團體蠢蠢欲動就二○一七年普選特首提出意見，香港民主促進會就率先公布極為騎呢嘅普選方案，其中提到特首提名委員會可以由選舉管理委員會隨機抽出選民加入，咁選民咪要靠好彩先有份投票選特首？
龍家麟（右）同司馬文對自己提嘅普選方案都未搞清楚。
唔單止咁，民促會提議特首參選人只要獲得提名委員會八分之一或至少十萬名地區選民提名支持，就可以參選，但奇就奇在呢啲候選人要首先宣誓，確認會遵守包括向中央政府負責嘅誓言，先可成為「正式候選人」。唔好以為「正式候選人」就金剛護體，皆因提名委員會可隨時向選管會投訴「正式候選人」違反誓言，甚至展開除名司法程序。民促會政策委員會主席司馬文解釋，呢啲要求等同求職者見工，都要接受公司提出嘅條件先有機會獲聘喎。
究竟所謂嘅誓言包括啲乜嘢呢？公然要求「結束一黨專政」嘅梁國雄有冇違反誓言呢？由法官一言堂決定係咪違反誓言又係咪公平呢？一旦參選人不服上訴，牽涉嘅司法程序分分鐘無了期延後特首選舉。對於呢一切嘅謎團，民促會主席龍家麟都當堂O晒嘴，同司馬文一中一英咁各說各話，不如佢哋返去傾多陣先再開過記者會啦！
