政壇：陳恒鑌援山區報救命恩
陳恒鑌（右三）早前去韶關山區考察鄉村醫療所。
立法會議員Ben陳恒鑌話細細個喺普寧鄉下長大，成日唔着鞋通山跑。六歲嗰陣有「赤腳醫生」之稱嘅鄉村醫生去到佢條村，話可以幫小朋友免費做體檢。當時尚算健碩嘅阿Ben跳跳紮咁去做體檢，點知畀醫生檢出佢嘅肝臟比其他同齡小朋友大，懷疑佢患上流行性甲型肝炎。
陳恒鑌（右三）早前去韶關山區考察鄉村醫療所。
阿Ben話當時有段時間成塊面都黃晒，又成日暈同嘔，之後聽村醫話食藥休養，三至四個月後就完成康復。就因為咁，佢一直諗計希望可改善山區貧窮村落嘅醫療設備，以答謝村醫當年嘅救命之恩。
立會前排休會幾日，佢就同幾個朋友去韶關山區考察鄉村醫療所，又同鄉村赤腳醫生交流。返港後佢決定喺年底舉辦大型籌款活動同慈善音樂會，籌款為韶關部分貧窮山區村落翻新同重建已破爛不堪嘅醫療所。
