政壇：語言偽術高官耍家

正如尋日立會開大會咁，班泛民主派議員係咁狂質政制及內地事務局局長譚志源，追問有關二○一七年嘅特首產生辦法嘅進度，但譚志源講嚟講去都係三幅被，之後再拋出「適當時候展開廣泛諮詢」，呢啲咁嘅答案擺明係播帶喇！估唔到譚志源好似佢嘅前上司兼「恩公」林瑞麟上身咁，變咗「人肉錄音機」。

嫻姐斥答咗等於冇答

人民力量「慢必」陳志全眼見泛民議員多番追問都不得要領，於是改變方向，追問政府對政改嘅立場，更忍唔住諷刺譚志源「係咪要播錄音帶？」可能畀慢必嘅說話刺中，譚志源急不及待回應話：「答咗你後面嗰條問題先，錄音帶冇喺度。」好明顯佢係想幽番慢必一默，但佢本身就係人肉錄音機，播帶使乜錄音帶？

譚志源用播帶耍班議員，而運輸及房屋局局長張炳良就出另一招喎！話說工聯會嘅陳婉嫻質詢有關公屋輪候嘅問題，指有房委會成員曾經喺會上提出，依家二人家庭只係得最低工資嘅收入，竟然唔符合公屋嘅資產入息上限，直指局方有冇補救方法，又批評張炳回應問題時照稿讀有違學者嘅身份。

眾所周知，張炳入政府之前係大學教授，所以嫻姐先用呢點抽秤佢啫！但張炳竟然死撐，話自己係經過思考，認同內容先照稿讀，跟住佢又繼續照稿讀落去。嫻姐事後就批評張炳，答咗等於冇答。