SUN世代：分享色香味
鑽石、玫瑰或手袋，甚麼禮物最適合女士？朱嘉盈（Norma）收到的生日禮物─一個食譜分享網站，令她放棄銀行界證券分析師高薪厚職，搖身變成烹飪達人。這份厚禮，帶來一次意外的機遇，亦令數以萬計少女及師奶都愛上煮飯仔。
一份生日禮物，令Norma由銀行界證券分析師，變成烹飪達人。
Norma（前左一）與一班廚師合照。
Norma希望港人對烹飪改觀，享受煮食樂趣。
Norma（左）喜歡與朋友交流煮食心得。（受訪者提供）
三年前，Norma的未婚夫在她生日時，送上這份禮物─食譜分享網站，「佢知我鍾意煮餸，又鍾意同朋友分享烹飪心得，所以搵網頁設計公司，幫我訂造咗個網站。」之後她經常拍下煮過的菜式，上載到網站，「網站畀我記錄煮食過程，同朋友分享烹飪樂趣。」
Norma偏好烹調中餐，網上分享的食譜都以中菜為主，色香味就在網站散播，瀏覽網站人數愈來愈多，「網上隨時搵到大量精緻西餐食譜，但中菜食譜就好少，所以造就市場畀我哋。」
網站漸受關注，Norma發現分享煮食文化，可以感染他人。她說：「我喺外國長大，煮食係樂趣，但唔少香港人覺得入廚房係老土，所以希望透過網站改變呢種諗法。」在Norma的努力下，她一位朋友由討厭入廚，變成擁有一身好廚藝，令Norma得到成就感。她說：「我朋友最初煎魚都唔識，依家識煮好多餸，見到佢既轉變，我好開心。」
網站不但改變他人，亦逐漸改變Norma。因網站受追捧，有食品公司主動接觸她，希望在網站宣傳。看到網站商機，她在一年前作出大膽決定，辭去穩定的銀行工作，全職打理網站。她回憶：「銀行同事好震驚，因為我當時喺公司係最後生嘅部門主管，佢哋覺得點解我咁好前途都唔做。」
Norma開始「一腳踢」工作生涯。她苦笑說：「開始時好難請人，香港好少人想做細公司。未請到人，辦公室裝修、煮食、拍攝等等，都係我一個人做晒。」經過一番努力，網站已上軌道，但令她最開心的是粉絲的讚賞，她說：「有次搭車聽到兩個女仔讚我哋個網站『日日煮』做得好，當時好開心。」
Norma's Profile
職業：DayDayCook.com負責人
學歷：西雅圖華盛頓大學商業及財經學士
興趣：烹飪、攝影
