政壇：搞搞政：驚聞祝升官 高永文尷尬
設計圖片
立法會食物安全及環境衞生事務委員會尋日落區巡街市，佢哋專登邀請埋食物及衞生局局長高永文加入，結果官員、議員加秘書處一行人聲勢浩大，先後巡視旺角、九龍城及牛頭角三個食環署街市。尋日艷陽高照，街市內溫度不低於三十度，一眾慣咗冷氣房嘅高官議員大汗淋漓，巡到牛頭角街市時，一名年逾八十嘅補鞋匠李伯同佢哋寒暄，仲好開心咁祝高永文官運亨通、步步高陞，隨行嘅議員黃毓民又加把口話：「裝冷氣，做特首！」高永文聽到後一臉尷尬，當堂唔識應對。
設計圖片
李伯認為，高永文嘅民望高、待人謙虛有禮貌、工作能力強，係將來嘅特首好人選。亦有小販不忘佢十年前處理沙士問題嘅出色表現，相信佢一定能夠解決街市嘅問題。
街市熱辣辣，唔少議員一邊巡一邊抹大汗，不過高永文卻好似唔怕熱咁，內穿恤衫、外再加件風褸，同議員一件恤衫都要捲起衫袖好唔同，唔通真係捱慣咗熱廚房，零舍唔怕熱？佢哋呢次巡視街市主要係了解街市檔位租戶面對嘅困難。
