政壇：韓連山技癢答英語提問
民陣尋日公布七一遊行記者會撐場時，召集人孔令瑜面對記者以英語提問時，雖然未至於口啞啞，但其濃厚嘅港式英語引起唔少人關注，包括退休前任教英文嘅教協理事韓連山，韓本身喺幕後坐定定，結果都忍唔住技癢「出山」代答，如果背後加多塊黑板，在場人士真係以為自己上緊英語堂。
話說孔令瑜搞咗咁多年遊行，應付記者可謂經驗豐富，但當孔令瑜遇上韓連山，一切就唔同囉。孔令瑜尋日回答第一條英語問題時，韓連山已經對孔令瑜解釋向警方申請「五萬」定「五十萬」人上街嘅說法有啲質疑，之後就變身韓老師以流利英語重複孔嘅說法，仲代答之後好幾條英語問題，更喺一啲「NOT」嘅重要字眼上加重語氣，被代答嘅孔令瑜表情如舊、面黑黑咁，佢身旁嘅副召集人王浩賢更當堂好似學生咁坐定定，聽韓老師教英語。
