政壇：高官哈韓紛住取經
設計圖片及對白
韓流襲港已唔係新鮮事，但今次卻係吹襲政圈！教育局局長吳克儉（吳得掂）今日會帶隊赴南韓訪問四日，同當地教育界、尤其係初級教育界嘅人士會面，今次係繼環境局局長黃錦星上月帶領立法會嘅環境事務委員會考察團去首爾考察之後，不足兩個月內，特區政府第二個外訪團去韓國取經，唔通特區高官亦變哈韓一族？
設計圖片及對白
參觀幼園及電子書發展
吳得掂今日會同班教育界人士去韓國首爾作官式訪問，同行嘅成員仲有免費幼稚園教育委員會主席鄭慕智、香港教育城行政總監鄭弼亮、教育局副秘書長葉曾翠卿等，佢哋會參觀韓國嘅幼稚園、初等學校及梨花女子大學，了解當地幼稚園教育及電子教科書嘅最新發展。行程中，仲特別安排參觀當地嘅幼兒教育振興院、首爾市及韓國嘅教育研究情報院等，似乎吳得掂一行想喺香港構思十五年免費教育時，吸納啲韓國經驗。
特區政府過去都經常派官員向外取經，但不足兩個月連派兩個團去同一目的地就幾少見。早前黃錦星先同多名立法會議員去咗首爾，考察及研究當地嘅都市廢物管理手法，依家又走去研究幼兒教育，可見韓風銳不可當。
講開又講，吳得掂上任以來，教育範疇唔見有乜好評，但外訪就比唔少官員頻密，以今年嚟計，幾乎兩個月一次。
今年一月尾，佢先去咗英國參加「世界教育論壇」，三月中，又拉隊去美加訪問，足迹遍及加拿大多倫多、美國紐約等，依家又去韓國訪問，如果再計吓訪京等，吳得掂小心成為離岸局長呀！
