「飲大」意思即係飲醉酒,點解係「大」就不得而知。但係雖然係「大」,都有不同程度嘅「飲大」。例如「大大哋」即係小醉,「大咗」就即係醉到胡言亂語或醉到瞓咗。「中大」唔係大學,係指中等程度飲醉咁解。

已故巨星羅文先生有首歌叫《醉眼看世界》,歌詞通俗抵死地講述醉咗之後嘅感受,依家聽都完全唔覺過時。其中有一句係「醉眼看世界,人人古怪」,不過喺香港地生活,唔使用醉眼去睇,都真係人人古怪,所以有時真係寧願飲醉,都唔想清醒去面對。唔知係咪因為咁,連廉署都要擺多幾支茅台得閒招呼吓啲強國高官,等大家飲到「大大哋」,咁咪會對鄰近地區嘅種種奇冤怪事見慣不怪。講到怪,都唔夠特區政府咁怪,衰完一個又一個,最近又有一個行政會議成員出事,商交所主席、市建局主席兼行會成員震遠哥要黯然辭公職。呢個香港搞成咁,真係唔可以清醒去睇,難怪好多香港人晚晚都要「飲大」!

依家有時唔止飲酒會用個「大」字去形容,就算話人言過其實都可以用「講大咗」。食嘢食到滯可以話係「食大咗」,玩嘢玩出火都可以話人「玩大咗」,當然搞嘢唔小心,就肯定會「搞大咗」,隨時搞出人命就真係「大」件事!

酒乃穿腸之物,酒入愁腸愁更愁。成日「飲大」始終會對身體造成影響。再加上飲咗酒之後判斷力、自控力薄弱,好易「飲大」變「搞大」。話雖如此,但保安局長竟然公開叫啲女性唔好「飲大」,以免被非禮。呢啲膠爆嘅言論,我有理由相信黎局長講嘅時候係「飲大」咗!唔係又點會胡言亂語?

第一手消息請下載on.cc東方互動iPhone/iPad/Android/Windows Phone Apps