立法會年初引入手語即時傳譯服務時係威係勢,原本打算分階段將服務擴展至內務委員會及財務委員會,但據聞招標反應麻麻,加上早前「拉布四子」拉布拉足四星期,幾個手語傳譯員被迫陪佢哋加班,難怪冇人肯捱義氣。

香港聾人子女協會嘅手語傳譯員尋日透露,全港合資格嘅手語傳譯員只得十個,但法庭同立法會已經搶去全港僅餘嘅四個全職員工,全港有成七千個聾人日常喺唔同地方需要手語傳譯服務,大呻聾人連睇病都好難同醫生溝通,邊有閒情去理班議員講咩?

第一手消息請下載on.cc東方互動iPhone/iPad/Android/Windows Phone Apps