政壇：捐遺體助教學 高永文陷掙扎
設計圖片及對白
換錯心事件令醫療界近期籠罩大氣壓，有人擔心事件或影響醫護界嘅士氣，有人就擔心可能影響器官捐贈活動。泰山公德會尋日舉行咗個儀式，宣傳遺體捐贈活動，唔講唔知，依家本地醫學院教授學生面臨嘅困境愈來愈大，食物及衞生局局長高永文尋日就明言，依家願意喺死後捐出遺體嘅人愈來愈少，唔少大學醫科學生上解剖堂時都唔夠遺體用，可能過多三至五年就要靠電腦模擬圖，取代真實嘅遺體，簽咗捐贈器官卡嘅高永文都坦言，對捐贈遺體仲有掙扎。
設計圖片及對白
泰山公德會眾人齊簽字
問高醫生掙扎啲乜？佢好神秘咁話：「掙扎完先話你知。」高醫生呢個答案都好令人掙扎喎！其實，高醫生嘅坦白作答，都揭示咗捐贈遺體行動嘅難度。因為唔少人縱使願意死後捐出器官、拯救或延續他人嘅生命，但對捐獻遺體都可能有一定保留，呢個亦係近年解剖學缺乏實戰嘅原因之一。
有醫學界人士就話，一個地區嘅醫療水平同行業得到幾多支援同配套係息息相關嘅，香港人期望本地醫療水平提升，應該多啲支援呢個界別，但現實卻係社會同文化嘅變遷，令佢哋面臨嘅挑戰愈來愈大，甚至病人同相關團體都會以訓練不足嚟批評佢哋，令人大感無奈！
一向以宣揚大愛精神為宗旨嘅泰山公德會，尋日由會長陳英傑連同夫人，及八名會員一同簽字，決定逝世後將遺體捐贈予香港大學醫學院解剖系，做教學及醫學研究之用，呢個無私行動既傳揚大愛，又造福港人，實在令人敬佩。
