設計圖片及對白

工聯會喺去年立法會選舉風車陣「五缺一」,搞到「票后」陳婉嫻出盡九牛二虎之力先可勝出超級議席,據聞工聯會近日提早四出游說目標人物喺下屆出選,勞工界議員鄧家彪同郭偉強因不成文規定自動上榜,另外一個就係去年僅以些微票數喺新界東落敗嘅前勞工界議員葉偉明,但聽聞葉偉明傾向不再參選,即風車陣又少咁一瓣葉,幾近甩皮甩骨。

設計圖片及對白

再講嫻姐同王國興倘一六年立會再度上陣,將以六十九歲同六十七歲之齡參選,體力能否負荷屬未知之數,因此佢哋係咪會披甲再戰冇人說得準,加上政圈要求政府重劃立法會地方選區由「五變六」嘅呼聲有增無減,倘連同超級議席同兩個近年均由工聯會囊括嘅勞工界議席,佢哋係咪一下子搵到近十人領軍參選,真係冇人敢「寫包單」。

面對呢個疑似青黃不接嘅情況,據聞佢哋傾向搵啲可以鋪路直選嘅新星上位,而形象專業嘅副理事長梁頌恩同銀行業僱員協會主席李麗貞,近年雙雙走勢凌厲,話唔定未來都有機會更上一層樓。

第一手消息請下載on.cc東方互動iPhone/iPad/Android/Windows Phone Apps