政壇：陽光時務週刊將變月刊
曾專訪前全國政協「尖啤」劉夢熊大爆同特首梁振英恩怨而出位嘅《陽光時務週刊》，尋日突然喺最新一期刊登公告話，下一期起將「休刊創新改造」，預計三個月內改為月刊，並開通社區型網絡平台。尖啤玩爆料，盡地一煲，結果搞到周身蟻，依家連呢份「週刊」都要摺埋，真係燶埋一堆。
「週刊」嘅前身原本係網上版，去年十月至推出印刷版，但知名度一般，直至今年一月刊登尖啤嘅專訪，先至有番少少知名度。不過，其後尖啤被廉署政公調查，更加連全國政協都冇得做。
「週刊」創辦人陳平接受傳媒查詢時，否認受到政治壓力，停刊原因係發行量未達理想，未來會即時把握時代脈搏。至於「週刊」訂戶要喺一個月內提出要求，先可獲退款安排。
