政壇：泛民區議員多大懶蟲
「社區發展動力培育」尋日公布區議員「活躍度報告」，主要由十八區區議員嘅會議出席率、發言同提交文件次數三方面評分，結果發現最勤力嘅二十大議員中，得三個係泛民議員。出席記者會嘅幾位泛民議員，唔知係咪覺得調查結果唔啱心水，一致否定調查公正性，白鴿黨劉慧卿話調查只知道區議員嘅工作量，反映唔到區議員嘅工作質素。連喺調查中最勤力提交文件嘅新民主同盟，其代表范國威都話細政團有利創造可觀數據，證明呢個調查有大把進步空間。
雖然調查亦發現有建制派嘅大懶蟲，包括北區區議員李國鳳，出席率只有五成七、提交文件同發言次數竟然係零；另外東區嘅蔡素玉喺過去一年從未提交文件，出席率都係高過一半多啲。不過，事實上泛民議員嘅出席率真係比建制派議員低。
