政壇：煲冬瓜水皮貪湯害苦秘書
正所謂好事不出門，醜事傳千里，好似年初無厘頭被委任做全國政協委員嘅前廉政專員「貪湯」湯顯明，最近被傳佢喺年初上京開兩會時，因為「煲冬瓜」普通話水平極差而笑料百出，累到有人遲收工。
話說政協會喺閉門嘅小組會議上輪流發言，如果煲冬瓜差嘅人都有自知之明，通常講三至五分鐘就收口，點知貪湯諗住自己係新丁要搶鏡，一開口就講足十幾分鐘，在場政協聽唔明都無所謂，要忍住唔笑先最辛苦。貪湯咁勇猛，唔通佢飲完茅台先發言？
唔好以為貪湯噴完一輪口水就算數，事關政協小組會議會紀錄每人嘅發言，秘書即時寫低啲政協講過乜，但秘書聽唔明貪湯啲煲冬瓜，就算周圍問其他政協佢講咗啲乜，點知冇人聽得明，最後搞到秘書要攞佢份講稿照抄，無啦啦增加工作量。其實貪湯多年來同啲內地官員飲飲食食，點解連煲冬瓜都學唔好呢？莫非好嘢唔去學，衰嘢就學到盡？
