Sun奇古怪：Sun潮語：【洋垃圾】
成日話時間可以治療一切，但係有一啲傷痛，就唔係咁容易可以磨滅。無錯，痛苦係可以隨時間而變得麻木，但係就算傷口可以唔再流血，疤痕永遠都會喺度，提醒你曾經有過呢一段過去。2012年10月南丫島海難奪去咁多條人命，連調查報告都出晒話香港海事處係要負上責任，但係竟然海事處到今日都無一個正式嘅道歉同交代！處長只係chok晒樣話已經表示歉意，呢啲咁嘅人形垃圾繼續糧照出，真係垃圾都不如。
「垃圾」呢個詞語近年都頗受重視，不過都係以洋文形容居多。記得以前政務司司長唐唐有個名言叫做：「This is totally Rubbish！」令到垃圾重新備受重視，可以講得上係「廢物利用」。不過最近國內有個潮語叫「洋垃圾」，就真係值得大家好好學習，兼且要好好利用。
「洋垃圾」呢個潮語係嚟自鄰近地區，即係我哋偉大強國。咪以為「洋垃圾」係荼毒我國精神文明嘅文化垃圾，其實係可以照字面解，係嚟自外國嘅實體垃圾。近年有國內成衣商人，用低價收購外國垃圾站執到嘅衫，甚至係死人着過嘅衣物，然後洗幾洗又或者係洗都唔洗就賣畀自己嘅同胞，大陸網民就形容呢啲貨品叫做「洋垃圾」。
呢啲垃圾有嚟自歐洲國家如法國，亦有嚟自亞洲國家如韓國等。不法商人就用呢啲「洋垃圾」當好嘢賣畀自己血濃於水嘅同胞。眾所周知，我國黑心食品，劣質假貨充斥市面，對於一個製造垃圾嘅國家，竟然仲要輸入垃圾，真係非常合乎國情。國情係咩？就係你同我都唔會明……可能因為我哋同上面係嚟自唔同星球嘅文明吧！
