政壇：搞搞政：資深政務官又爆出走潮
設計圖片
公務員薪酬趨勢調查日前曝光，加薪數字跑輸通脹，官場中生代會否又出現新一輪「出走潮」﹖政務官出走近排不絕於耳，據聞曾做過唐英年新聞秘書嘅陳維民，早兩個月正式過檔到金融管理局出任助理總裁。最新消息話，曾任特區駐成都經濟貿易辦事處主任嘅潘太平亦會離開政府，有傳佢會到香港賽馬會慈善信託基金幫手。
設計圖片
近年因為跳離熱廚房嘅明日高官真係唔少，○六年離開政府嘅馮永業，短短七年間先後到生產力促進局同機場管理局工作。曾任旅遊事務專員嘅方舜文早年亦跳到貿易發展局做副總裁，公營機構外，連四大商會都出現過佢哋嘅足迹，好似前政務司司長唐英年嘅「愛將」袁莎妮，佢前年接替提早離職嘅方志偉做總商會總裁，成為總商會成立以來第一位女總裁。其後曾出任司長新聞秘書、又做過政府多個部門嘅蘇家碧，經過逾半年高官再就業「冷河期」後，今年初終坐正做工業總會行政總裁。
最新投入商會「大內總管」之列嘅係去年六月底離開政府嘅前政制及內地事務局副局長黃靜文，消息話佢會喺七月一日正式履新中華廠商聯合會行政總裁。政府輸出人才後最少要三、五、七年先有相等資歷嘅人才補上，睇嚟當局都要正視吓呢個現象喇。
