政壇：黃安源退休變身住家男
才華橫溢嘅黃安源（右）及靳棣強，昨日因陀飛輪而馬場結緣。
胡琴大師兼前香港中樂團團長黃安源尋日首次入馬場，同太太出席一個港產陀飛輪品牌活動，同場仲有知名設計師靳棣強夫婦等。黃安源話，由內地移居香港三十幾年，唔打麻雀、唔買六合彩，亦唔賭馬，今次係生平第一次入馬場，笑自己唔似香港人喎！醉心收藏古董錶嘅黃安源話，退休後主要教胡琴、玩古董錶及學書法，得閒就同太太飲吓茶、去吓旅行。
才華橫溢嘅黃安源（右）及靳棣強，昨日因陀飛輪而馬場結緣。
黃太就踢爆，自從兩人結婚四十周年之後，老公仲負責去街市買餸添！黃安源聽罷幽默補充話：「點止呀！仲要做埋家務。」估唔到才華橫溢嘅大師，原來都係住家好男人。同場嘅靳棣強就話，最近就忙於喺內地開講座，兩個月內穿梭十幾個城市，十分頻撲。佢教授嘅對象主要係大學生，因為內地家長十分支持子女投身創意行業，令到報讀設計嘅學生勁多。靳叔話，相較之下，香港嘅家長始終想子女選讀金融、醫科及會計等專業，設計行業唔係咁受落。
