政壇：長毛粗野兼插水 胡志偉敵我不分
設計圖片及對白
行政立法關係問題多多，佢哋响政壇三日一小仗、五日一大仗，連綠茵場都係佢哋拗手瓜嘅地方，呢類軟實力，一向都係靠外援食胡嘅立法會天下，更創下十七場不敗嘅紀錄。尋日開波前落過幾場大雨，議員同官員喺度試過各款摔角，唔差在泥漿啦。不過，尋日嘅大戰，議員隊卻因為泛民代表倒米，白鴿黨嘅胡志偉同社民連嘅長毛相繼出醜，搞到立法會嘅長勝桂冠都失埋。
設計圖片及對白
賽和收場 連贏斷纜
立法會請槍連贏十七場，今次又點呢？賽和收場囉。今次隊長陳克勤一口氣請咗十個外援，落場就只係搵咗七個成員，建制派除咗佢之外，只係得番「鐵腳」黨友梁志祥、何俊賢（高佬），同埋工聯會郭偉強。但最唔爭氣嘅都要數泛民隊員，IT界莫乃光二十幾年來第一次落場，踢唔夠二十分鐘已經冇力，胡志偉就開波冇幾耐好似「戴志偉」上身，帶住個波如入無人之境係咁扭，可惜係對住自己個龍門猛衝，出醜兼差啲自殺。再加上長毛上場已經差啲幫對方入波，難怪陳克勤都忍唔住恥笑：「泛民都係唔係好識分龍門喺邊面」。
胡志偉冇耐就拐吓拐吓出場，原來係踢爛咗對鞋，佢笑到見牙唔見眼，隊友就質疑佢係咪帶對道具波鞋落場博離場！胡志偉雖然死撐「純屬意外」，不過，佢隨即好快唔見影。等到下半場先現身嘅長毛，為貫徹議會內外都同政府對立嘅形象，甫落場就出動「鉸剪腳」一個整跌兩個，之後仲表演「插水」兼累街坊，連累民政事務局副秘書長麥敬年（Jonathan Mckinley）都畀佢摔跌，長毛嘅招數似乎同佢嘅「拉布」戰術一樣，一樣咁粗野喎！
