Sun奇古怪：Sun潮語：【快叉】
Sun潮語：【快 叉】
智能手機嘅普及，實在為人類嘅生活同心態帶嚟嚴重衝擊。依家喺屋企或者出街，都會機不離手，眼球無時無刻都係盯住部手機。有啲人甚至一起身牙都未刷就會攞起個手機嚟o架，直至瞓上床為止都係睇住部手機。呢啲情況喺公共交通工具上特別嚴重，喺巴士地鐵由3歲到60歲人人都係咁低頭捽電話，大大減少了人與人之間嘅交流。陳百強有首歌歌詞係 「地下鐵碰着她……」，我諗呢種浪漫情懷今日已慘被淘汰。歌詞應改為「地下鐵按電話……」，咁改會比較正確。科技，以人為本？定係科技以玩人為本？
Sun潮語：【快 叉】
不過就係因為依家啲人不斷玩電話，搞到啲電話好快無電。今時今日電話無電，就好似隱形一樣與世界脫軌，感覺像被外星人捉咗去外太空咁，所以電話一旦無電，就急需要「快叉」！即「快速叉電」是也。「快叉」唔止可以解燃眉之急，後來仲引伸成為咗潮語。「快叉」嘅「叉」係嚟自英文「Charge」，即係充電咁解，係港式粵語譯音字。逢親同充電有關嘅嘢都係用呢個「叉」字。例如充電器叫「叉機」，充電線插頭叫「叉頭」等等。要注意嘅係，「叉電機」短路「燒」咗，並唔係叫「叉燒」，因為叉燒係要嚟食嘅。呢種情況，你一定要成句講「叉機燒咗」，但發音要準，否則又會變成「叉雞燒鵝」，造成誤會。
潮語「快叉」，除咗係用嚟形容電器充電之外，亦可用喺人嘅身上。人嘅「快叉」即係快速休息一陣，或快睡片刻，讓身體精神充一充電，起身再搏過。
人體「快叉」通常係喺工作期間出現，有時夜晚蒲得夜或做得夜，第二朝一早又要開工搏殺，睡眠不足，精神唔夠，一起身就只係得3％電，以致時刻需要「快叉」吊命。好多人會趁食晏伏喺張枱度「快叉」，有人會匿喺廁格小休，有啲會落街食支煙，有啲人甚至企喺度都「叉」得到，可謂各叉各法！
