政壇：政商定格：商販通緝林琳自首補鑊
麗城街市商販於區內廣貼大字報，「通緝」當區區議員林琳。
近排香港政壇有多人被通緝，除咗「佔領中環」義工陳玉峰，因參與前年七一遊行後嘅非法集會被警方「低調通緝」而其後拘控外，屬於建制派嘅荃灣區議員林琳，最近亦畀所屬選區內嘅商販周街貼大字報「高調通緝」。不過，林琳並無好似陳玉峰咁「玩失蹤」。究竟佢係犯咗乜事呢？
麗城街市商販於區內廣貼大字報，「通緝」當區區議員林琳。
林琳
話說林琳所屬選區嘅麗城街市，租約原定明年八月先到期，但街市大業主近日突然想提早喺十月收舖，惹來一眾商販不滿，自然希望搵當區區議員幫手，點知佢哋搵咗一排都搵唔到，一怒之下就喺區內廣貼大字報「通緝」林琳，怒吼「尋找消失區議員，躲到哪裏？」、「林琳區議員請盡快現身，為民請命」等。
據聞「通緝令」不但驚動區內人士，連林琳所屬政黨建仔亦關注事件，質疑林琳經常出席各類社交場合同不時更新自己嘅facebook專頁，但相對就較少親身落區會見選民。據聞林琳好快就主動「自首」搵番班商販見面「補鑊」，有關大字報亦隨即拆除，雙方重新將矛頭指向麗城街市大業主，希望對方可認真回應佢哋嘅訴求。
