政壇：搞搞政：議席分唔勻譚志源頭痕

冇得加議席嘅離島區就大呻話單純按整區人口計算對佢哋唔公平。以大嶼山區為例，即使扣除東涌同愉景灣等，整個選區仍有成個香港島咁大，加上東涌北不斷有新屋入伙，預計該區人口到一六年會增加約二萬人，要求當局起碼要加多一個議席。

葵青區就話佢哋人口超過五十一萬，按政府一萬七千多人有一名區議員嘅基數計，四捨五入應有三十席，最少都要增加一席先啱，反而目前議席最多、但人口不斷減少嘅東區就唔使減，認為政府做法好唔合理。黃大仙區就對隔籬嘅九龍城區獲增加兩席深表不滿，認為過往因舊機場關係而屬於九龍城嘅啟德新發展區，裏面嘅居民其實同黃大仙區關係仲密切啲，該兩席應歸佢哋。但九龍城區就堅持啟德一向歸佢哋管，冇理由割畀黃大仙。

即使獲建議增兩席嘅沙田區議會，都認為要一次過加三席畀佢哋先夠，因該區一向分開做大圍、沙田市中心同馬鞍山三區，各區近年人口都有增長，只加兩個議席都唔知分畀邊區先啱。