政壇：杜振源試菜宴 老饕舔脷
杜振源（右）同大廚Harlan Goldstein拍住上搞餐廳。
「快勞夾大王」Simon杜振源年前開始進軍飲食界，今年底仲會開多三間食肆添，咁進取，莫非佢想做埋「飲食大王」？身為國際小母牛香港分會籌款委員會主席嘅佢話，現時旗下兩間餐廳已有定期舉行籌款晚宴，籌得善款全數撥捐畀小母牛，雖然數目唔算多，但勝在有心喎！
杜振源（右）同大廚Harlan Goldstein拍住上搞餐廳。
牡丹蝦刺身配白蘆筍及溫室青瓜血橙
煙熏牛舌配野生火箭菜及吞拿魚醬
Simon日前就邀請一眾老饕好友，到佢位於中環雲咸街開設嘅高級多國菜餐廳試菜兼畀意見，順道交流籌款嘅事。佢特意吩咐大廚炮製精緻佳餚，個個食到舔舔脷。一向嘴刁嘅馬會大董葉澍堃都對美饌讚不絕口，尤其一道鮮嫩無比嘅香煎法國龍脷柳Dover Sole，配以清新嘅檸檬橄欖油醬汁，搞到佢減緊肥都忍唔住口，另外仲有牡丹蝦同牛舌菜式都好好味。仁濟醫院前主席吳守基就帶咗兩年前喺小母牛籌款活動中，由Simon捐出、畀佢投得嘅「神之水滴」RICHEBOURG紅酒，同好友分甘同味。
