政壇：高永文Greg蘇外訪急返歸
設計圖片及對白
立法會政府帳目委員會今日召開公開聆訊，公審「貪湯」前廉政專員湯顯明，而喺公審之前，貪湯又被揭發以公費訪問內地四日，但其中真正嘅考察行程只得一日，其餘三日似係去觀光旅遊、飲飲食食多啲，佢任內幾乎每年出訪一次英國，更疑似係為咗探仔多過公幹，引起社會嘩然。唔知係咪因為前車可鑑，近日兩名問責局長出訪內地同歐洲，都將行程排到密密麻麻，而且喺官式活動一結束就雞咁腳仆返港。
設計圖片及對白
留多一晚都驚
食物及衞生局局長高永文同商務及經濟發展局局長Greg蘇錦樑，尋日分別展開歐洲同河南鄭州嘅訪問行程。其中高醫生首站到英國訪問兩日，拜訪當地嘅醫療同研究機構，仲去埋當地嘅超市實地視察對方嘅限買奶粉政策，之後會轉飛德國參觀位於克茨廷嘅中醫藥診所，然後再到瑞士日內瓦出席一年一度嘅世界衞生大會，翌日立即返港。至於Greg蘇，就喺聽日出席完中國中部投資貿易博覽會開幕禮後，會即刻坐夜機返港，留多一晚都唔敢。
講開高官外訪，政務司司長林鄭月娥尋日出席一項活動時自爆，當年佢剛畢業考入政府後，即時孭起背包到內地旅遊，而且走遍大江南北，因為怕入咗政府就冇得去旅行喎，可見當年做官少好多公費旅遊機會，唔似「貪曾」前特首曾蔭權爵士同「貪湯」咁，成日借啲意濫用公帑，瘋狂外訪。
