SUN世代：百煉接班人
盲婚啞嫁人人怕。超力米粉太子女莫傑琳的一生，被父親一早安排，遵循「放洋留學、回巢掌權、發揚家業」三部曲而行。回巢初時，莫家在公司大權旁落，她被投閒置散，艱苦捱過心灰意冷的歲月後，她帶領莫家重掌話事權，繼而致力改革經營方針，由零售轉為餐飲批發，做出佳績，現時更獲超市邀請重返零售市場，延續過去神話。她無悔捱過「太子女辛酸歲月」，「因為呢個身份，我嘅人生先咁豐富、咁精彩。」
莫傑琳視床品生意為親生Baby，在她手上發揚光大。
放假時，莫傑琳愛與丈夫及女兒到處旅遊度假。
莫傑琳與父親（中）及丈夫（左）一同慶祝生日。（受訪者提供）
出生便與米粉結下不解緣，莫傑琳決心讓家業再上高峰。
「超力，超力力力力力……」一句耳熟能詳的經典廣告對白，最近又在廣告中「翻生」熱播，正當港人熱愛的福字麵被收購，七二年成立的超力，是即食麵品牌中，唯一由港人主理的「香港品牌」。「細細個爸爸就話，公司以後交畀你。我三、四歲仲跟過爸爸去傾生意。」莫傑琳與品牌同年出生，自此一生與品牌結下不解緣，接手家業可謂命中注定。
人生被預定，莫傑琳被父親安排放洋留學，更放棄鍾愛的化學工程科，轉攻會計系，「爸爸知道我想讀化學工程，打長途電話鬧足我半個鐘。」甫畢業，她被急召回巢幫手，主理出品部，二十歲女拿着三十公斤行李及貨辦，隻身走遍歐洲搵生意，做到累時想嗲爸爸，結果換來兩行眼淚：「爸爸一接電話就問我做咗幾多客，點解唔做多啲？無客就搵黃頁啦。」
初出茅廬，被鬧到喊司空見慣，她更不像其他繼承人輕易掌權，反而備受冷落：「我返嚟時，公司賣咗六成股權，爸爸覺得自己讀書唔多，想有專人搞好間公司，所以就賣咗（股權），不過佢認為盤生意係我哋嘅，所以就安排我留喺公司。」孤軍作戰，莫傑琳整整一年遭禁止出埠：「做出品最緊要出去搵客，無得出自然無客，嗰時做到心灰意冷。」
不受重視，找不到新客，莫傑琳自覺不能堅守爸爸心血，多次打下辭職信，只是不敢遞：「我想做好爸爸嘅生意。」父親叫她到旗下一間床品公司做總經理，暫時引退，但她依然心繫食品品牌：「無耐，公司出現好多問題，新拍檔唔係咁識營運，我就同爸爸夾手夾腳回購公司股份。」
○二年，米粉品牌重回莫家懷抱，由莫傑琳打理。
她放棄超市零售，轉型主打餐飲批發，結果盈利有幾百倍增長，重振品牌名聲，現時更獲大型超市斟上架：「話晒我哋歷史悠久，市民對我哋都有信心。」她冀盡力搞好公司，守護爸爸命根。
莫傑琳小檔案
現職：超力國際食品董事總經理
學歷：澳洲昆士蘭大學會計系學士
興趣：閱讀、烹飪
