政情：政商定格：金剪成慶生錫番蔣麗芸
蔣麗芸（右一）同曾鈺成（右二）齊切蛋糕慶祝生日。
立法會主席曾鈺成今日六十六歲生日，雖然佢今次唔使再好似舊年辯論議席出缺安排咁，喺議事廳內度過生日，但佢嘅黨友尋日就好細心咁喺宴會廳搞咗個生日會，同時幫尋日生日嘅Ann蔣麗芸慶祝。曾鈺成愛徒李慧琼仲特別訂造一個象徵剪布得米嘅八磅重「鉸剪蛋糕」送畀師傅，搞到佢全程尷尬苦笑。
蔣麗芸（右一）同曾鈺成（右二）齊切蛋糕慶祝生日。
被稱「金剪成」嘅曾鈺成話生日願望係希望食咗把朱古力「鉸剪」後，從此唔使再出動鉸剪剪布。當黨友唱盡中、英文生日歌後，異常風騷嘅曾鈺成更加出人意表咁錫咗阿Ann臉珠一啖，阿Ann就即刻笑到見牙唔見眼，忘記晒日前被主席警告嘅不快事。
被問到係咪已經同阿Ann言歸於好，曾鈺成就反問：「乜需要咩？」阿Ann都話佢哋曾喺黨團傾過呢個問題，明白主席對新入立會嘅黨友特別嚴厲，所以佢會刨熟啲《議事規則》將勤補拙。至於突然之間畀主席錫一啖係咪好驚喜時，阿Ann就好感觸咁話：「都擔心o架，唔知阿嫂點諗呢？」
