政情：搞搞政：港島未改劃區建仔先內訌
設計圖片及對白
政府早前建議一五年民選區議會議席數目增加十九席，因而傳出重新劃區嘅消息。政府早前放風有意將東區部分議席轉移畀灣仔區，即時令建仔內訌。消息指「雙料議員」鍾樹根同建仔東區支部認為最好區界不變，如果要變最多都係分維園、天后、炮台山同城市花園等四席畀灣仔，唔想勢力被削弱。但聽聞以北角為根據地嘅「蔡菜子」蔡素玉私底下不滿被打散，如果要劃就應將整個北角併入灣仔。
設計圖片及對白
正當兩大陣營角力之際，估唔到殺出個程咬金，立法會區議會界別議員葉國謙突然加入戰團，除支持蔡菜子外，仲建議話不如將灣仔區同中西區合併。據聞樹根同意割讓四區入灣仔，其中一個原因係佢友好維園區議員周潔冰可順利轉至灣仔區，甚或有力問鼎灣仔區會主席，屆時就可擴大勢力。正因為咁，有人唔想樹根坐大，所以支持蔡菜子嘅建議。
據聞政府內部都唔急於作決定，故尋日有份同十八區區會正副主席見面嘅政制及內地事務局局長譚志源，講及劃界一事口風都好鬆動，再三重申依家當局持開放態度。
