政情：德成局長放長假惹揣測
聽聞政府打算喺區議會劃界動大手術，諮詢一開始必定惹起好多爭議。區會劃界一定關民政事務局局長曾德成事，但德成局長就係吼住喺諮詢剛開始時放假鬆一鬆，一定係諗住遲啲有氣都無得透，早啲放定假先，放完假至返嚟做最後總結。
政府尋日刊登憲報宣布曾德成喺下周四開始放假，直至下月十一日為止，前後一共二十日假期，期間會由副局長許曉暉署任，印象中曾德成係新政府上任十個月來，一次過放最長假期嘅問責官員，即時惹出各方揣測呢次休假並不尋常，甚至有陰謀論話可能係別有內情。
但有官場中人大派「定心丸」話，德成局長呢次只係正常放假，唔需要有不必要嘅猜測，更加絕對同身體健康無關，因佢尋日都仲同緊十八區區議會主席見面，亦有持續落區聽取地區人士意見。聽聞許曉暉近日搶先喺德成局長前放幾日假，相信都係同稍後要署任局長有關。
