政壇：搞搞政：蔣麗芸小學雞激奀主席
設計圖片及對白
立法會尋日正式結束歷時多日嘅預算案「拉布戰」審議，由於建制派早知主席曾鈺成會剪布，所以好多都打破連日嘅沉默，把握機會發言批評四位拉布議員。
設計圖片及對白
話說建制派議員Ann蔣麗芸唔知係博出位定係冇準備，發言時除咗話唔認同拉布議員提出削減街道清潔開支外，又話唔同意要削減公務員薪金，希望將來唔使審議呢類修正案，又指斥拉布議員令立法會成為大輸家。至於全民退休保障方面，佢又話政府嘅福利及教育開支不斷增加。此時曾鈺成開腔要求佢發言精簡同埋要以預算案內容為主。唔單止離題，之後阿Ann又打斷泛民議員發言。
被主席多次警告後，阿Ann發言更加亂晒龍，竟然將年份二○三○年講成二○○三年，即時被主席糾正。可能阿Ann連番遭受挫敗，於是發爛渣鬧主席話：「主席，雖然我哋係同黨，你蝦得過就蝦，既然你蝦咯，咁我都冇嘢講喇主席。」曾鈺成就話自己有責任執行議事規則。阿Ann似足小學雞咁，激到主席紮紮跳。佢事後話，可能主席因為驚被泛民話偏幫自己黨員，所以寧願打自己啲仔女喎！
