如果有留意呢個專欄，應該對「膠」呢個潮語都唔會感到陌生。因為不經不覺寫過多個有關於「膠」嘅潮語。不過唔知點解啲「膠」寫極都仲有，可能香港實在太多「膠」。唔好唔記得，香港以前係以「膠」起家，六七十年代香港輕工業發達，家家戶戶都會幫手一齊穿「膠」花。勢估唔到嘅係，今時今日輕工業已經蕩然無存，只有喺歷史博物館先至會見到我哋以前嘅「膠」史。雖然香港依家無人會再去產「膠」，但依然有大把人喺度「派膠」！

「派膠」呢個潮語，顧名思義就係將啲「膠」派出去。「膠」當然係指一啲「硬膠」嘅事，又或者一啲荒謬絕倫嘅理論同見解。「派膠」就係將呢啲「膠論」經大氣電波或互聯網散播出去。

到底派乜「膠」就因人而異，例如警務處長，就會「派膠」話「低調通緝」咗一個人兩年，但所謂通緝犯在兩年通緝期間，可以上報上電視，仲可以出入境，兼可同特首坐同一班飛機。如果咁都叫通緝，處長真係「膠」得可笑！

另外一個「派膠」例子，仲有立法會議員Tree根哥，佢話啲人搞佔中會令香港國際聲譽受損，佢咁講就真係膠中之膠！香港地嘅國際聲譽，包括言論自由、新聞自由、廉潔指數等，已經被Tree根哥所屬單位同成班建制派愛國愛港好朋友出賣得七七八八，乜佢覺得自己喺個咁屈機嘅議會，仲有國際聲譽可言？

「派膠」又未必一定係名人，普通人都可以「派膠」，甚麼愛港力愛港之聲，就以集體「派膠」為主要活動。早前「港女500」，也因為喺網上「派膠」叫啲朋友如果做五百蚊人情就唔好嚟飲呢件事，爆紅網絡，惹嚟全港網民聲討。咪以為「派膠」係派就一定唔收錢，例如你每年交稅，換嚟嘅係成班高官日日「派膠」，仲攞埋你啲錢去豪畀啲強國貪官！「膠」就日日派，「派錢」又唔見佢哋咁爽快？

第一手消息請下載on.cc東方互動iPhone/iPad/Android/Windows Phone Apps