政壇：釋智慧籲後生做好本分
釋智慧病愈後復出，精神不錯，但講到病情一度眼濕濕，以手拭淚。
寶蓮禪寺住持釋智慧大和尚兩年前曾中風入院，康復後亦少咗喺公眾場合露面，尋日佢主持寶蓮禪寺浴佛慶典，冇再手執扶仗，精神唔錯，一見記者就慨嘆身體大不如前，言談間法師眼濕濕，又以手指拭淚，好似有種死過翻生嘅感慨，智慧法師話依家好多事都唔識，冇以前咁叻，但被問到最近社會出現嘅矛盾及對「佔領中環」行動嘅睇法，佢都話：「香港人只要有飯食、有工開、有地方住已經最好喇！」
釋智慧病愈後復出，精神不錯，但講到病情一度眼濕濕，以手拭淚。
大師話，以前啲後生都會聽吓佢講嘢，但依家啲後生好多都反政府，未讀大學就鬧政府，叫佢點講嘢呢？呢番說話聽落好玄，似乎係暗示啲後生要做好本分。咁佢對政府想要大搞大嶼山，推行「港貨專區」配合港珠澳大橋啟用又有乜睇法呢？大師就話，大嶼山大把地，用嚟起樓最好。至於昂平一帶嘅發展，佢就講佛偈話「禮佛一拜，滅罪河沙；念佛一聲，福增無量」。快將八十二歲嘅佢又話，自己有大把接班人，雖然佢冇乜讀過書，但都供晒十個徒弟讀博士，所以交班冇難度。
