政壇：澳洲商會盼增功能界別
香港澳洲商會一班會員日前同新民黨立法會議員葉劉淑儀食飯，據講，席間有會員講到香港功能界別唔夠代表性，希望增設一個專為外國商會而設嘅界別。葉劉透露，本來午宴議題係講普選，但在席人士麻麻哋有興趣，反而緊張功能界別存廢。
原來在港嘅澳洲籍人士有八萬人咁多，唔少人都活躍商界同專業界別，佢哋有聲音認為現時兩個商界議席，即係香港總商會及中華總商會嘅代表都冇代國際商會發聲。呢班商會會員話，香港賴以成功係自由發展，如果將來咩都受到限制，又標準工時又最低工資，咁香港競爭力只會愈來愈低。偏偏現時立法會過分政治化，功能界別只為本地商界發聲，所以希望增加一個外國商會界別，由英、美、澳等商會聯手選出代表，幫居港外國商人發聲喎。
