政壇：鬍鬚曾被譏紙板人
設計圖片及對白
立法會審議財政預算案撥款陷入拉布戰，拖咗兩個禮拜仲未走出困局，但政府臨時撥款用盡嘅最後限期又愈來愈近。日前，財政司司長曾俊華同人民力量及社民連嘅拉布議員會面，希望佢哋釋出善意、停止拉布，畀公共財政恢復健康運作。不過，拉布四子只得三個人出席，大家見面又各自表述立場，最後都不歡而散。大舊陳偉業指摘鬍鬚曾係紙板人，亦有與會者話鬍鬚曾講嚟講去都係政府冇水之苦，而拉布三子又重複佢哋嘅三幅被，大家鬥做人肉錄音機。
設計圖片及對白
鬍鬚曾同拉布議員會面，事前政界都冇乜人睇好，不過政府都出動鬍鬚曾、財經事務及庫務局局長陳家強（傻強）、常秘、庫務等共九名官員參加會面，拉布陣營則有長毛梁國雄、大舊陳偉業同慢必陳志全，長毛一行先喺立法會大樓拉橫額、嗌口號，壯聲勢後先過去政府總部，鬍鬚曾佢哋就早早嚴陣以待。據講，會面中氣氛普通，你有你講、佢有佢講，四十一分鐘會面雖然冇人拍枱、冇人爆粗，但係遠遠談唔上拉近共識。
林奮強現身撐填海
結果亦唔使講，長毛佢哋話會照樣拉布，懶理鬍鬚曾變身人肉錄音機嗌救命；政府則發動各政策局齊齊喊苦，尋日所見，勞福局嘅張建宗、食衞局嘅高永文，再加上財經局嘅傻強，人人都循唔同途徑發放拉布已令政府經費危危乎嘅訊息，連立法會主席都開腔話聽日就會考慮剪布。
另外，政府尋日搞咗個填海諮詢論壇，自偷步賣樓風波後休假多月嘅行政會議成員林奮強都有現身撐填海，問到近排政界多事，佢幾時回歸行會？林奮強就話「要搞掂自己嘅問題先」，適當時候就會向外公布喎。自言三十幾年前讀大學時已係「環保人」嘅佢，堅持填海係香港發展所需，仲話近嚟做緊政策研究，研究幫香港社會突破「樽頸位」。
