SUN搞作：少膽虫手記：燒銀紙

又問點解？因為壹全霉又出盈警囉，出面啲分析員仲話全年埋單要蝕15億。大拿拿15億，全部都係攞去燒咋！人哋話捐錢返內地好難幫到水深火熱嘅災民，唉，我知，但係點都令一部分人富起來吖！淫黎呢？搞《爛果》、搞《喪報》，全部都係害人不淺嘅嘢，仲要踩隻腳去電視台，點會唔蝕死？！

話說有一日，我返到公司大門口，就見到淫黎踎喺度唔知搞乜，但見漫天飛灰，望真啲，原來係燒緊冥通銀行嘅新鈔。「虫，部印刷機仲印緊，快啲嚟幫手！」我成日都抱住個想法，就係識得慎終追遠嘅人，點都壞唔透，淫黎仲要開埋印刷機印冥鈔，雖然我唔知佢燒畀邊個，見佢咁落力，我就埋去幫幫佢。

「有排使有排使，落到去，鍾意搞鹹書又得，開妓寨又得，最好就再搞《爛果》、《喪報》啦……」淫黎一輪嘴咿咿哦哦，我就愈聽愈心寒，唔通佢個腦真係蝕入膏肓？

或者係我唔夠歷練，面上嘅惶恐畀淫黎一眼睇穿，佢忽然話：「虫，預咗兩疊畀你，落到去繼續打我工啦！」……嘩！原來淫黎生勾勾燒錢都未夠，仲要燒定冥鈔畀自己，落到去繼續蝕。嗰刻，我嘅智慧突然大爆發，即刻打上編輯部：「肥豪，你叫埋fing春蘇出嚟大門口，腦細要同你哋簽長約，多多錢都有得傾！」就喺肥豪同fing春蘇以為有金執衝埋嚟之際，我即刻趁亂閃咗去，呵，呢兩個懵仔，真係唔該晒。