政壇：搞搞政：宣傳家是香港豪花276萬
設計圖片及對白
政府話要發放正能量而搞嘅「家是香港」活動，宣傳使咗幾多錢？政府一直都話有關活動嘅大部分活動經費來自現有資源，不涉額外開支，點都唔肯講具體要用幾多錢。我哋早前就翻查預算案，估計有關活動要用五百萬元，唔知係咪因為咁，終於撬開民政事務局局長曾德成把口，尋日以書面回應議員提問時，交代有關活動宣傳開支用咗二百七十六萬元。
設計圖片及對白
單計活動啟用禮一場大龍鳳用咗八十萬元，出動咗六十七名工作人員；而啟用禮後派街坊嘅文件夾、襟章、八達通卡套、Ｔ恤、活動標誌原子印同紙袋就一共整咗六十萬元。但有啲問題仍未解開，例如若有機構有興趣要加入成為夥伴機構要點做，以及政府具體會如何評核機構活動配合主題同目標。德成局長話會按活動主題、目標、公眾參與程度，以及活動是否具創意而評定，真係講咗等於冇講。
我哋前排問過愛港之聲召集人高達斌，問佢哋有冇興趣捧場撐政府，點知佢連「家是香港」呢個活動都唔知。二百七十六萬元宣傳費係咪物有所值？咁就要等公眾判斷喇！
