政壇：蔣麗芸食素都收唔到火
拉布戰持續，立法會部分議員有感由朝到晚困坐頹會，唔食得健康啲睇怕命都短幾年，於是向秘書處提議增加宴會廳素菜比例，尋日開始試行。全場唯一食素嘅EQ葛珮帆自然最開心，仲踢爆黨友Ann蔣麗芸上月起亦偷偷哋轉食素，想話借機收吓火，順勢摵甩「政壇元秋」之惡名。
阿Ann經常同「長毛」梁國雄喺議會內外舌戰，今次倣效EQ食素下火似乎未見成效。好似兩人早兩個星期喺《城市論壇》碰頭已經火花四濺，面對長毛嘅專業挑機好快就按捺不住，火氣十足。日前長毛喺拉布期間發言，阿Ann亦沉唔住氣寧願用手掩耳唔聽，更喺社交網站大呻唔掩耳抖抖「真係隨時腦癱」。阿Ann嘅下火配方唔多見效之餘，仲隨時有生命危險。
