政壇：毛孟靜挑機反被窒
設計圖片及對白
每逢遇到泛民主派「拉布」，立法會議員「阿王」王國興就會表演寫大字，然後張貼喺會議廳以示反拉布。尋日阿王重施故技，公文袋嘅議員毛孟靜就挑機，點知投訴不成反被窒。
設計圖片及對白
立法會尋日繼續就政府財政預算案拉布，但會議廳外就傳出一陣墨水味，原來又係阿王喺度寫大字。佢用篆書寫咗「財政危機倒數8天」，之後就拎咗入會議廳張貼，點知就惹嚟毛孟靜投訴。
梁君彥︰拉布都冇時限
毛孟靜就話唔知阿王寫大字係裝飾吖，定係行為藝術，仲問當時做代主席嘅梁君彥，阿王貼晒啲大字喺議事廳會留低膠紙印，咁樣算唔算毀壞公物喎。對於呢啲咁小學雞嘅問題，梁君彥原本都好有禮貌咁答佢，話秘書處會有答覆，點知毛孟靜竟然仲咄咄逼人，話希望有個時限，秘書處要喺時限內回覆。
梁君彥聽完之後就唔耐煩，仲反寸抽水唔識收手嘅毛孟靜︰「拉布都冇時限啦！」而有份拉布嘅黃毓民唔止冇幫拖，仲掉轉嚟撐阿王︰「大家掛吓囉，而且手字都幾靚！」搞到毛孟靜即時口啞啞。
雖然毓民幫拖撐阿王，但誓死反拉布嘅阿王都係唔領情。阿王仲話支持主席曾鈺成以馬拉松自殘方式開會，等拉布四子冇得食飯、冇得去廁所，預計不出四十八小時佢哋就會頂唔順，咁就可以解決拉布。我哋就問阿王，如果拉布四子唔「冧」咁點算呢？佢就話「佢哋唔冧就我哋冧！」
