海難卸膊招民怨 官僚墮落搭沉船

太一叮講緊嘅咪就係舊年發生嘅南丫島撞船慘劇咯。港府日前公布海難調查報告，踢爆海事處做事馬虎，推搪塞責，無論審批船隻圖則、監督建造、檢驗程序，幾乎每個階段都犯錯甩漏，埋下沉船禍根。嗱，座椅鬆脫，救生衣裝備違規，入水位上限界線超標，船隻千瘡百孔，問題多多，海事處居然全部發雞盲睇漏眼，真係講都無人信。而更令人難以置信嘅係嗰道消失了的水密門，居然可以三番四次避過審查，結果船隻相撞兩分鐘內極速沉沒，造成三十九人喪生，你話究竟係意外定係人禍吖？

海上安全攸關人命，一個接一個嘅人為失誤固然令人驚訝，而更令人驚訝嘅係港產官僚嘅態度。調查報告公布至今，無任何高官為慘劇鞠躬道歉，而海事處處長廖漢波更死不認錯，拒絕道歉，唔通佢哋嘅良知已經同出事船隻一齊沉咗落大海？定係所謂問責制根本就係嗰道消失了的水密門呀？

嗱，公道自在人心。「東方報業民意調查」顯示，四成七受訪者直斥海事處敷衍失責；三成二指船隻監管制度存在漏洞；一成認為海事處連串出錯種下慘劇禍根。對撞船事故造成死傷枕藉，而廖漢波居然拒絕道歉，四成六受訪者狠批佢無承擔責任；兩成六直斥佢不知悔改及反省；兩成一認為欠死者家屬一個交代。

漢波漢波，責任交波，廖漢波縮骨卸膊，佢嘅上司有乜反應呢？運房局局長張炳良話喎，現時最重要係找出制度同程序上嘅問題，進行全面及徹底嘅改革，又話自己對慘劇心情沉重，相信廖漢波心情亦一樣喎。

聽完張炳良咁講，市民就真係心情沉重嘞。失職官僚唔問責，制度同程序點改都無用啦，現時夠有法例訂明船上要有一定數量嘅兒童救生衣啦，海事處轉個頭咪一樣闊佬懶理，執法求其，有制度咪等於冇制度。所以話，如果港府唔對海事處執行家法，清理門戶，任何法例都係假嘅，海上安全始終隱患重重，隨時又搞出人命嘅咋！

一句講晒，海難卸膊招民怨，官僚墮落搭沉船。人命關天，絕對唔能夠再有任何甩漏，今次修理海事處，當局千祈唔好再走漏眼呀。話時話，官僚系統千瘡百孔，香港風雨飄搖，不斷沉淪，今屆政府成日話「適度有為、穩中求變」，咁就快快做番個負責任嘅船長，修補呢艘破船啦，叮！