政壇：政商定格：何俊賢入馬場型look變蝦碌
何俊賢潮着皮褸牛仔褲入馬場，點知唔符合馬會規例要換褲。
立法會漁農界議員「高佬賢」何俊賢尋日受馬會主席施文信邀請入沙田馬場食飯，Gel行個頭嘅佢，身穿黑色皮褸、直條恤衫、洗水牛仔褲同尖頭皮鞋現身。係就係幾型嘅，但基本上成套衫都違規囉。結果佢被馬會職員「特別招呼」，帶佢去換番條專為貴賓預備嘅西褲至上得廂房。之但係高佬賢成六呎三吋高，唔知馬會啲褲啱唔啱佢着呢？
何俊賢潮着皮褸牛仔褲入馬場，點知唔符合馬會規例要換褲。
李文斌（左）追住男職員，職員即場除低件西裝褸畀老闆着番。
高佬賢自知着錯衫，都顯得有啲尷尬，佢解釋話朝早忙完公務至趕入馬場，所以冇時間換衫。
理文造紙董事總經理Edmond李文斌嘅愛駒「包裝動力」出賽，身穿綠色西褲、白色恤衫，打綠白間斜紋呔嘅佢，帶班來自東莞紙廠嘅員工入場湊熱鬧。咦！其中一個男職員着住嘅綠色西裝褸，同佢條西褲顏色一模一樣，冇幾耐Edmond從後追住男職員取回西裝褸，原來佢係借西裝褸畀對方頂住先。
