何偉航(左起)、王宇來同李卓人喺意大利餐廳食餐「好少少」嘅。

香港國際貨櫃碼頭工潮進行咗三十幾日,工人嘅罷工行動不斷升級,由最初留守碼頭抗議,變到喺碼頭外紮營露宿,之後仲移師去中環長江集團中心外過夜添,工人不停爭取自己嘅權益,期間唔係參與集會,就係瞓喺帳篷入面,食飯盒。

何偉航(左起)、王宇來同李卓人喺意大利餐廳食餐「好少少」嘅。

我哋上星期五中午喺太古廣場嘅意大利餐廳,見到支持碼頭工人罷工嘅職工盟秘書長李卓人、職工盟總幹事王宇來同碼頭業職工會總幹事何偉航喺度開餐。佢哋叫咗一個肉腸薄餅、一碟茄汁意粉同一碟海鮮意粉,三個人分嚟食,佢哋仲一人一杯意大利咖啡添。佢哋呢個開懷大嚼嘅場面同報紙電視上抗爭嘅情景格格不入,莫非佢哋頂唔順,要去擦番餐勁嘅?

佢哋唔係應該同班工人共進退咩?阿人話佢哋嗰日要喺金鐘高等法院上庭,期間有一個半小時午飯時間,咪去附近食餐便飯囉,過程中除傾官司外,仲有講到貨櫃碼頭工人罷工行動嘅問題。餐飯食咗四百幾蚊,由佢嚟畀錢,佢話兩位同事喺呢段時間都好辛苦,成日捱更抵夜,所以食餐好少少,當稍作休息都係應該喎。

呢餐飯真係幾豐富喎,係咪諗住慶祝定單官司會勝訴呢?阿人就話官司勝訴與否真係好難講,但無論點都要食飯啦。至於工潮方面,佢就話進展係點要視乎班工人接唔接受資方嘅條件。但依家資方又唔肯去談判桌上傾,話咗加人工,但又好似冇乜表示,所以咪搞到啲工人對公司冇晒信心咁話。

第一手消息請下載on.cc東方互動iPhone/iPad/Android/Windows Phone Apps