政壇：波波疑當鍵盤局長
設計圖片
繼之前一篇以「割地指控、豈有此理」嚟形容中環軍用碼頭指控嘅網誌後，發展局局長「波波」陳茂波尋日再次化身「鍵盤波」，以網誌怒轟反對中環用地劃作軍事用地嘅團體。佢話城規會喺二月中就軍用碼頭地皮改為「軍事用地」嘅修訂刊憲，畀公眾响兩個月內提出申述，申述期截止最後一日早上，城規會只係收到不足十份申述書。
設計圖片
不過，當日有報章以「解放軍先『佔』中環」和「起碼頭變起樓」為題作出不實嘅報道，繼而又有個別團體响網上「加料」傳播，以失實指控誤導公眾兼引起恐慌，更借助社交網絡平台提供反對信件的式樣，邀請市民向城規會提出反對，以致在網上睇到有關不確陳述和呼籲、又未能掌握事實全部嘅市民，響應起嚟提出反對，結果令城規會最後收到近萬份申述書。
出席活動 態度急轉
佢直斥呢啲團體利用現有制度和程序，試圖癱瘓、甚至推倒多年幾經諮詢、匯聚各方意見而成嘅碼頭設置，仲話呢種手法值得大家反思，又重申駐軍已承諾响碼頭唔使作軍事用途時，開放畀市民享用，呢個承諾是嚴肅嘅，並非信口開河。之不過，佢尋日出席活動時冇提及網上發炮，只係好溫和咁話會聆聽各方申訴，態度即一百八十度轉變，唔通波波淨係識做網上局長，寫（網誌）就天下無敵，答（問題）卻有心無力？
呢番言論矛頭直指反對事件嘅保護海港協會，保港會副主席李傑偉反駁，佢哋只係向市民交代客觀事實，唔明點解市民發表意見係癱瘓政府工作。
