政壇：搞搞政：建制派內訌 爭元朗議席

下一屆區議會同立法會選舉仲有幾年，但政界喺地區嘅部署卻從未停過。早排我哋報道過灣仔同東區可能重新劃區後，聽聞人口不斷膨脹嘅元朗區亦計劃新增三、四個新選區，建制派亦因而傳出內訌互片嘅消息，據聞，新民黨為擴大元朗版圖，先從中產區入手；民建聯就拉攏新界社團聯會（新社聯）硬撼不斷坐大嘅工聯會，但新社聯之前又多次表明想打響旗號派人參選，結果，新社聯理事長陳勇變咗拉攏嘅對象，政界搶住羅致佢。

元朗區建制派內部惡鬥喺天水圍北逸澤選區未停過，工聯會已計劃派人落去插旗，建仔同新社聯嘅結盟隊伍亦諗緊搵人迎戰，依家工聯會同建仔因為路線與立場唔同已經分家，雙方已冇乜偈傾，至於新社聯，建仔就早早出手，最新公布嘅中央委員會名單就搵咗陳勇擔任副主席，以便聯手對抗工聯會。陳勇早前講過，建仔係政黨，而新社聯係政團，兩者各有所長，亦係獨立個體，會合作但資源唔會合併。