SUN奇古怪：Sun潮語：MK

香港雖然係一好細嘅地方，喺地圖上都係得一點，用 “孤高”地圖要瘋狂ZOOM IN先睇得到。但係如果細心啲睇，香港地其實有山有海有城市有河流，以地貌嚟講算係相當豐富。加上因為香港面積細，我哋可以呢頭喺公司開會，但半粒鐘後就可以去沙灘滑水。上晝去郊外行山遠足，下晝即刻可以同啲行山友喺聯誼會打番四圈。正正係因為咁，所以香港人習慣生活多姿多彩。又因為香港唔同區有唔同feel，連帶住喺嗰區嘅人都有唔同性格特色。例如港島人會覺得自己靚仔斯文過九龍人，新界人又會覺得自己係純樸過港九人。有時甚至去到十八區嘅人都有不同特色，例如大埔人係 “團結啲”，屯門人係 “孝順啲”，中環人係 “貴族啲”……當中最具代表性，相信都係 “MK”人，因為一講 “MK”，成個型像即刻出晒嚟!

咁點先算好 “MK”呢， 旺角嘅核心價值又係咩呢？ “MK”當然係從衣着談吐講起，首先個LOOK一定要係夠潮，仲要係CHEAP潮嗰隻，即係潮得嚟又要有啲蠱惑仔元素，啲衫褲全部要夠平，最好係啲平價商場嘅首輪時裝。同時髮型方面最好係以 “金毛”為主，但有時其他顏色都會有 “MK”嘅效果，總之係有染髮就最好。言行舉止方面，最好係要夠 “低俗”，無論男女粗口係少不免，最好就擔埋支煙，咁就非常之有 “MK”仔 “MK”女嘅台型。唔一定要住喺旺角先叫做 “MK”仔女?只要你蒲開MK，又着得 “MK”就算你嚟自天水圍、油麻地、順利、蘇屋、白田、屯門、荃灣……都可以非常 “MK”，與大家打成一片。

“MK”除咗形容衣着言行之外，有時都會用嚟描述行為同性格。喺網上討論區，好多網民(以所謂宅男為主)會指摘啲 “MK”仔，只係專門會氹啲少女上床。仲只係徒具 “型”嘅外表，但毫無內涵嘅一群。 佢哋又覺得“MK”女係會為個名牌手袋同人上床，總之 “MK”就等如物質至上，盲目追求金錢嘅價值。