政壇：政商定格：廖偉麟嗌老友投資忍手

今年經濟走勢好難捉摸，日前一眾青年才俊聚首，大家嘅話題都離唔開經濟，善於投資商廈嘅廖創興家族後人、紀惠集團副主席廖偉麟（Jeffrey）話，短期內經濟前景唔明朗，嗌班老友忍忍手，暫停一切重大投資，等到經濟轉趨明朗化再作打算。難得近日比較清閒，加上日圓大跌，佢啱啱去咗日本滑雪度假，揀最啱嘅時候消費。

香港青年聯會賢慧社姊妹張詩培日前邀請Jeffrey同胞姊廖偉芬，仲搵埋城中一班年輕才俊拉隊去西環一間潮州菜館開餐，順道同移居加拿大、最近返港探親嘅青聯副主席彭芷君（Gigi）敍舊，馬會董事葉澍堃細仔葉瀚華（Ian）、莎莎國際老闆郭少明千金郭詩慧及丈夫陳振邦等都有出席。