揀基金盲婚啞嫁 強積金所託非人

人不可貌相，阿媽教女揀老公，高大靚仔未必穩陣o架，萬一所託非人咁就一世。其實打工仔揀強積金一樣o架咋，如果你以為基金（Fund）資產額最大、規模最大、名頭最響，就一定最穩陣，最適合託付終身，咁就太傻太天真嘞。

嗱，想知基金點樣大而無當，睇吓一項調查先啦。強積金「半自由行」實施咗接近半年嘞，但係調查顯示，轉移戶口申請宗數只得四萬八千宗，僅佔全港打工仔嘅百分之二，比原本預期嘅百分之十差咗一大截。喂，半自由行嘅原意係透過市場競爭降低收費o架嘛，家陣反應冷清成咁，咁咪即係廢咗武功？

半自由行推出時係威係勢，點解半年唔到就畀人去勢呢？咪就係因為基金外強中乾，打工仔揀唔落手囉。調查係咁講嘅，市面上十隻資產額最大、規模最大嘅基金之中，好多都巖巖巉巉，根本唔能夠託付終身。就講收費水平吖，已經相當搵笨，當中五隻基金嘅開支高於百分之一點七平均比率。至於回報率方面，表現仲離譜，其中兩隻保守基金，三年來嘅累積回報居然連一個百分點都無！

喂，三年來通脹升咗超過百分之十二，咁咪即係話，打工仔節衣縮食月月供款，啲錢唔止無大幅增值，反而仲畀通脹蠶食？咁搞法，未到退休筆錢都蒸發得七七八八啦，仲點積穀防饑呀？大家明啦，強積金本來回報率已經低絕人寰o架啦，原來大型基金更加係大而無當，打工仔分分鐘遇人不淑，對半自由行點會唔先天性冷感吖，叮！

仲有吖，調查機構批評，目前積金局嘅基金收費比較平台透明度低，一來反映唔到最新價格，二來反映唔到價格調整幅度，三來又容許成立不足兩年嘅基金唔使提供開支比率，制度同大型基金一樣，都係銀樣鑞槍頭，得個樣。試諗吓，打工仔喺「盲Fund啞價」之下，紛紛遇上講金唔講心嘅基金負情郎，點會唔喊得一句句吖！

講到呢度，等太一叮做個總結。強積金推行十三年，種種事實證明，根本此路不通，所謂為打工仔積穀防饑，積錢防老，不過係港府推卸安老責任嘅搵笨藉口。曾經滄海做阿水，除卻巫山一舊雲，錯咗十三年嘞，都係時候撥亂反正啦，港府快快孭番安老責任，效法新加坡政府，自己營運強積金，唔好害打工仔抱憾終身！

總之，強積金就係盲婚啞嫁，港府以積金局監管更加係所託非人，港產官僚再唔醒覺，信唔信市民同你哋分手吖嗱，叮！