SUN世代：女校男生受歡迎

「男生們是非，我細細聲講給你……」做女校男生，男生諗起都爽，謝冠成曾經做過。原來，他是女校插班生，「去到女校發現成間學校得六個男仔，全部VIP嚟o架，我都幾多女仔圍住o架，不過因為係男仔嘅關係，我要做晒全校嘅苦力。」他說，讀女校最難忘不是桃花旺盛，而是忽然勤力。自稱成績差，曾經留級的他笑說：「讀女校成績好大進步，因為唔可以衰畀啲女仔睇嘛，嗰時成績好到可以升中六添。」

也許，他就是天注定要與別不同的一群，他曾有過許多意想不到的經歷。「以前喺三門仔住，真係乜都試過，為咗去睇個風景而跑上山，但上咗去幾乎落唔返嚟；又試過我哋成班細路畀人蝦，綁住咗喺山邊無人之境，要人嚟救先返到屋企。」一個又一個驚險畫面，他仍歷歷在目，言語間仍有打不死的意味：「我無諗過會命喪山頭喎！」孤獨練成堅強，謝冠成就是打不死的硬漢子。