SUN搞作：少膽虫手記：頒獎畀自己

前晚個金像獎頒獎典禮，真係睇到條虫涕淚縱橫！一班台前幕後工作人員，辛苦咗咁耐，終於實至名歸拎到獎，真係勾起咗少膽虫喺壹全霉嘅回憶！

少膽虫都諗過，如果喺壹全霉入面搞個頒獎典禮，拎「最大成就獎」嘅一定係少膽虫。十幾年黎，畀淫黎不斷「糟質」、每日不斷「作」新聞，條虫都無輕言放棄，呢種堅持，唔係人人做到o架！因為少膽虫嘅努力，《爛果》先可以有咁多威水史！

今日條虫返工，就向淫黎提議搞番個頒獎典禮，鼓勵吓班員工。今日淫黎心情都幾好，無即刻BAN咗條虫，反而係摸摸自己個肥肚腩，講咗句「呢個咁好嘅意見，我會考慮吓嘅」先趕條虫出去。少膽虫個內心不禁覺得，今次條橋好成功！

去到下晝，淫黎突然宣布籌備搞個聯歡晚會。呢一刻，條虫不禁志得意滿。原來淫黎打算請最鍾意着豹紋嘅慧EE幫大家高歌助興，當日仲會同時搞個籌款運動，鼓勵員工踴躍捐輸，用啲錢投番個「金爛果」喺公司擺。如此盛會，實在係千載難逢！

但係唔知點解，班虫仔虫女，知道咗呢個活動之後，紛紛向我投以厭煩嘅目光……