政壇：政商定格：盧偉國扮祈福黨夠詼諧

中大逸夫書院每年都會舉行「吐露絃歌粵曲籌款晚會」，逸夫書院院長陳志輝亦粉墨登場，同閨秀名唱家張琴思合唱一曲《聲聲慢》，仲請到音樂好手、立會工程界議員WK盧偉國同老婆黃少珍合唱《呃神騙鬼》。

《呃神騙鬼》故事講述由盧太扮演嘅婦人多日盼夫未歸，於是就請算命先生幫丈夫占卜歸期，點知就被假扮盲眼嘅地水先生WK亂扯一通，話佢老公被小人與邪花所困，如果想老公平安歸來，就要交出所有首飾珠寶作法祈福。婦人信以為真，將身上所有財物交予對方，騙子得手後逃之夭夭，而婦人就無辜破財。WK出場時戴上墨鏡，又不斷摸索扮睇唔到路，將盲眼地水先生扮得維妙維肖。兩公婆以詼諧嘅唱腔一唱一和，逗得台下笑聲不絕。