政壇：搞搞政：回收商再向黃錦星挑機

玻璃樽回收計劃諮詢期下月六日結束，專門喺港島酒吧區回收酒樽嘅香港泥頭車司機協會項目統籌April黎梅貞，擔心環境局局長KS黃錦星唔係好清楚佢哋嘅苦況，間接會破壞咗整個回收計劃，早喺二月中已主動向KS下戰書，要求佢喺諮詢期結束前，落區試吓回收酒樽嘅滋味，但事隔近兩個月後，KS都未表態，April惟有再出招，睇得出佢係提醒KS時限就到，回應就要快喇。

April表明若KS肯接招，絕對唔會畀機會對方做騷，並計劃一朝早就拉埋KS到最污糟、最多回收工序嘅灣仔區，體驗吓天都未光就要落手落腳執樽。

挑機還挑機，但佢都係講道理嘅人，佢話一般平時返工時間係清晨六點半至早上十一點，佢唔會要KS執足幾個鐘，但一個鐘就點都走唔甩，講到尾最大願望希望KS明白固定回收點對回收商有幾重要，希望政府唔好淨係「錢化」咗個回收計劃，真係出心出力幫吓手，批塊地畀佢哋做好回收工作喎。

據聞KS正積極考慮係咪接招，但基於佢早前去完南韓考察，事後要整理份考察報告，之後仲要趕住今個月推出份減廢藍圖，因此一切視乎時間係咪就到喎！