政壇：長毛或孤身玩拉布

立法會後日審議財政預算案撥款，社民連主席「長毛」梁國雄講明提出二百至三百項修訂「拉布」，希望迫使政府落實全民退休保障，佢強調無意停止拉布，因為呢個係最好方法迫使政府落實全民退保，仲話其他泛民議員如果唔拉布，應該喺政綱剔除「爭取全民退保」。

如果長毛玩到五月尾都唔肯收手，咁全部政府部門都會因無錢而全面癱瘓，泛民聞到燶味終於瞓醒，公文袋同白鴿黨今朝會開黨團會議傾立場，下晝召開「特別飯盒會」商討對策，諗吓點拆招。

其實泛民提出嘅修訂都係得幾十個，以消耗時間計都唔屬於拉布，但佢哋最怕長毛惹起嘅火會燒埋佢哋嗰疊，到時市民就唔止鬧長毛一人，所以泛民好大機會收回所有修訂，等長毛一人孤軍作戰拉布，而人民力量話就話提出修訂，但暫時未有具體詳情。至於拉唔拉布？人力陳偉業就話睇長毛頭喎！